Tuesday, April 2, 2013

ആ..., കിളി പോയി!

വായിൽ നോട്ടം കൊണ്ട്‌ ഒരുപാട്‌ പ്രയോജനങ്ങളുണ്ട്‌. ഈയിടെ എവിടെയോ വായിച്ചതാണ്‌. വായിൽ നോക്കുമ്പോൾ നമ്മുടെ ഉള്ളിൽ ഒരു പോസിറ്റിവ്‌ എനർജ്ജി രൂപപ്പെടുമത്രേ. അത്‌ നമ്മുടെ ആന്തരികാവയങ്ങളുടെ പ്രവർത്തനം കൂടുതൽ സുഗമമാക്കും എന്നൊക്കെയാണ്‌ അതിൽ വിവരിക്കുന്നത്‌. അതെന്തോ, എന്തായാലും കണ്ണിനു കുളിർമ്മ ലഭിക്കുന്നതു കൂടാതെ ഇങ്ങനെയും ചില പ്രയോജനങ്ങൾ വായിൽ നോട്ടം കൊണ്ടുണ്ട്‌ എന്നു മനസ്സിലായി. പറഞ്ഞു വന്നത്‌ അതല്ല, കഴിഞ്ഞ ദിവസം വൈകുന്നേരം ചായ കുടിക്കാനായി പുറത്തേക്കിറങ്ങിയതാ. ബസ്സ്‌ സ്റ്റോപിനു മുന്നിലൂടെയാണു പോകുന്നത്‌. ഒരുപാട്‌ പെൺകുട്ടികൾ നിൽപ്പുണ്ട്‌. നോക്കി നോക്കി പോകുമ്പോൾ പെട്ടെന്നൊരു മുഖം; എന്നെ നോക്കുന്നു, ചിരിക്കുന്നു. ജീവിതത്തിൽ ആദ്യത്തെ സംഭവമാണ്‌, ഇങ്ങോട്ടെന്തെങ്കിലും പ്രതികരണം കിട്ടുന്നത്‌. മനസ്സിൽ ഒന്നല്ല, ഒരു പത്ത്‌ ലഡു ഒരുമിച്ച്‌ പൊട്ടി. എന്തായാലും നോക്കി ചിരിച്ചതല്ലേ എന്നു കരുതി പയ്യെ അടുത്തു പോയി നിന്നു.
"എങ്ങോട്ടാ?"
ഞാൻ ഞെട്ടിപ്പോയി.
'അപ്പോ ഇവൾ എന്നെ നേരത്തേ നോക്കുന്നുണ്ടാവും'
"ഞാനൊരു ചായ കുടിക്കാനായിട്ട്‌ ഇറങ്ങിയതാ"
"നീ ആരുടെ കൂടെയാ വന്നത്‌? അച്ഛനുണ്ടോ?"
'സംഗതി കൈ വിട്ട്‌ പോയെന്നു തോന്നുന്നു'
"അച്ഛനോ, ഏയ്‌..."
"ജെയിംസ്‌ കുട്ടിച്ചേട്ടന്റെ മോൻ റോഷനല്ലേ"
'പണി പാളി!!'
"അല്ല"
"അയ്യോ, സോറിട്ടോ. ഞാൻ ഓർത്തത്‌ റോഷനാണെന്നാ. അവൻ നല്ല നോർമ്മലല്ല. ചിലപ്പോഴൊക്കെ അസുഖം കൂടുമ്പോൾ അവൻ ഇങ്ങനെ എങ്ങോട്ടെങ്കിലുമൊക്കെ ഇറങ്ങിപ്പോകും. അതാ ചൊതിച്ചേ"

'ആ..., കിളി പോയി!'

പിന്നെ ഞാൻ പോയ വഴി വേറെ ആരും പോയിട്ടില്ല എന്നാണ്‌ കേൾക്കുന്നത്‌.

No comments:

Post a Comment